Këngëtarja kosovare, Blerina Kastrati, ka fituar çmimin e katërt në Festivalin Ndërkombëtar të Këngëtarëve të Rinj “Dunav Stars”, i cili është mbajtur në Silistra të Bullgarisë. Kastrati në këtë festival po ashtu është shpërblyer me çmimin e qytetit të Silistrës, i cili i është ndarë nga kryetari i kësaj komune bullgare. Në skenën e festivalit “Dunav Stars”, në të cilin pjesëmarrësit kanë kënduar “live”, këngëtarja kosovare është ngjitur në skenë me tri këngë. Veç këngës së saj “Anonim”, ajo ka kënduar “Valsi i lumturisë” dhe “Son of a preacher man”. Kastrati është radhitur në mesin e fituesve pas Bullgarisë, të cilës i kanë takuar dy vendet e para dhe Gjermanisë që është radhitur në vendin e tretë. “Ka qenë nder i madh për mua, sidomos të kthehem si fituese e dy çmimeve. Besoj se ua kam ndritur fytyrën shqiptarëve”, ka thënë Kastrati për të përditshmen “Koha Ditore”.